رئيس مجلس الإدارة أحمد الشناوي

رئيس التحرير محمد يوسف

هي الحكومة عاوزة مننا إيه؟.. ياريت تقولنا عشان نعرف ونفهم إزاي نتعامل معها من أجل الله والوطن.. بقت كرهانا ومش طيقانا زي ما تقولوا كده الضرة وضرتها!

راكبة ومدللة رجليها وواخدة في وشها، وكل يوم تطلع بقرارات صعبة وترفع الأسعار وتسلب الحريات، زي ما تكون بتعاقبنا على ثورتنا الشريفة.

مش قابلة نصايح وعاملة نفسها فوق أي نقد، ولما تتكلم تقولك هو كده وخلاص واللي مش عاجبه الكحل مايتكحلش ويسد عينيه، زي ما أجدادنا كانوا بيقولولنا زمان لما كنا نغضب على شيء.

 وتيجي تنتقد تقولك كده بالمفتشر مفيش تصريحات مفيش إعلام خلاص خلصنا بح.

 ومش كده بس دا قراراتنا مش بتشمل وزراءنا ونوابنا وكبار دولتنا، والشعب لا زم يتحمل.

سكتنا وكظمنا غيظنا، وقلنا ماشي هي الحكومة ومفيش حد يقدر يتنفس بكلمة! نسكت ونشوف هتعمل إيه، واللي فات مات وخلينا ولاد النهاردة، لكن النهاردة طلع أوسخ من إمبارح، وفوجئنا برفع المحروقات ومن ثم المواصلات!

طيب نكتب إيه تاني ونقول إيه!

شفت الناس بتبكي بحرقة من آثار الغلاء ورفع الأسعار.. بالله عليكم أنتم راضيين عن ده!! مش كفاية كده يا جماعة ولا إحنا مش شايفين اللي مش شيفاه الحكومة!

إنت راكبة راسك ليه وبأعلى صوتك بتقولي أنا الحكومة..لأ يا ستي إنت الحكومة آه، ولكن إحنا الشعب ولازم تسمعي صوتنا وللا أنت مسنودة! ما تقولي فهمينا أرجوك؟ هو أنتِ عاوزة مننا إيه بالظبط علشان نعمله لترضي عنا وتسمعي لكلامنا وكلام الشعب اللي هاينفجر منك ومن قراراتك.

أرجوكِ يا ست يا حكومة أوعي تزعلي من كلمة الحق، الشعب ده ليه حق عليكِ ولازم تستحمليه، وكمان كلنا بنغلط ياستي ومفيش حد مش بيغلط، وأنت ماشية في سكة غلط، وللا هاتلعني سنسفيل اللي خلفونا.. مقبولة منك يا ست يا حكومة. 

وياريت كده يا حكومة، وبعد ما الناس استشاطت غضبًا، تتابعي وتشوفي الشعب عاوز إيه!

درجات الحرارة
  • 22 - 37 °C

  • سرعه الرياح :22.53
اسعار العملات
  • دولار أمريكى :
  • يورو :
  • ريال سعودي :

توقع...من الفائز بكأس العالم 2018؟

توقع...من الفائز بكأس العالم 2018؟
85.714285714286%
14.285714285714%